VL hulp na verwoestende brande op Memel
Vrystaat Landbou (VL) se grondvlakstrukture, “het na ‘n reeks van 7 verwoestende veldbrande vanaf Donderdagaand tot Saterdag in die Vrede-, Memel-, Verkykerskop- omgewing ingespring om brand help te koördineer” se Mnr Wicus van der Merwe, Sekretaris en hoof brandhulp koördineerder van die Memel Boerevereniging (MBV). VL het R100 000 vanuit die Vrystaat Landbou Rampfonds aan die Memel Boerevereniging oorbetaal asook 2 vragte ruvoer gereël wat vandag en môre afgelewer gaan word aan die Boerevereniging wat sal toesien tot die verdeling onder hulle lede waar alles afgebrand
het.
Ons innige meegevoel gaan aan die Le Roux gesin na die tragiese afsterwe van Mev le Roux (80) in die verwoestende brande. Ons vertrou Mnr le Roux sal ook spoedig aansterk nadat hy gehospitaliseer is met brandwonde. Daar word ook gesimpatiseer met al die boere wat groot verliese gelei het in terme van geboue, lewendehawe, voertuie, toerusting
en infrastruktuur soos heinings, water krippe en pype. Daar is boere wat tot 500 skape en 300 beste verloor het volgens voorlopige verslae. Die MBV hou vanaand ‘n vergadering om te beplan en koördineer asook meer gedetailleerde inligting bymekaar te kry. Verwerkte satelliet beelde wat die presiese oppervlakte en persentasie plase deur die brande geraak bepaal, is eers na 7 dae beskikbaar.
Van der Merwe was nie seker of die “Working on Fire” spanne ontplooi was nie. Dit was deur die Brand Offisier van die Noord Oos Vrystaat Brand Bestryding Vereniging later bevestig dat die onttrekking van Kishugu voertuie van WoF spanne veroorsaak het dat die Memel span nie ontplooi kon word nie! “Eers die volgende dag het boere die spanne kom oplaai om met ‘mop-up’ werk te help” het Van der Merwe gesê.
VL, asook die brand-offisier, het die bekommernis van ‘n tekort aan brandbestrydingsvoertuie al aan politiese hoës aangemeld, maar die ou WoF voertuie staan glo nog by plaaslike munisipaliteite om her-ontplooi te word. “Al het dit op plekke in die Vrystaat gereën, is daar nog ‘n lang brandseisoen wat voorlê en die wanbestuur van staatstoerusting kan nie geduld word nie” se Kempen Nel, voorsitter van die VL Natuurlike Hulpbronne komitee.
Die kontakpersone van die plaaslike Landbou Verenigings wat die ramphulp koördineer is as volg:
– Memel – Wicus van der Merwe 083 680 4686 / Tanya Als 071 686 8753
– Vrede – Romona 072 972 5025
Martinus Willemse, voorsitter van die Memel Landbou Vereniging sê hulle is oorweldig deur die oproepe en skenkings wat al aan die gebied gemaak is.
Donasies aan die Vrystaat Landbou Rampfonds kan via VL se webtuiste gemaak word by
https://vrystaatlandbou.co.za/donate/ Die MBV en ander sal ook vir nog fondse aansoek
kan doen na deeglike assessering afgehandel is in terme van VL se Rampbeleid.
