VL vergader met LUR’e rakende verhoogde veiligheid teen die Lesothogrens
Vrystaat Landbou (VL) het op 22 Augustus 2024 met die Vrystaatse LUR van Gemeenskapsveiligheid, mnr Mbalula asook die LUR van Landbou, me Rockman, vergader rakende die veiligheid en verhoogde misdaad wat alle grensgemeenskappe en grensboere teen die RSA/ Lesothogrens ervaar.
Ook op die vergadering was afvaardigings van die SAPD se topstruktuur, die SANW, Grensbestuurowerheid (BMA) en Huis van Tradisionele leiers. VL se aanbieding het gefokus op die hoë misdaad areas wat al vir etlike jare sodanige areas is, met onwettige deurgangsroetes na Lesotho wat deur kriminele geëksploiteer word om ‘n verskeidenheid van misdade te pleeg. Volgens Francois Wilken, president van VL, is probleme wat ervaar word onder meer veediefstal, oorgrens weiding, asook die voorkoms van Basotho’s en hul diere – wat nie gebrandmerk is nie- wat in baie grensdorpe se meentgronde voorkom. LUR Mbalula beplan om die grensareas binnekort te besoek ten einde gesprekke met boerderygemeenskappe in al die grensdorpe te voer.
Wilken het bevestig dat daadwerklike veiligheidsaspekte uitgelig is wat ook oorgedra gaan word na die SAPD se Landelike Veiligheidsberaad wat op 28 en 29 Augustus 2024 in die Vrystaat gaan plaasvind. Wilken hoop dat oplossings op die tafel gesit sal word om die grensveiligheid dringend aan te spreek.
Jakkals le Roux, voorsitter van VL se Landelike Veiligheidskomitee, meen daar was eenstemmigheid van al die rolspelers betrokke dat groter en beter samewerking moet plaasvind met verhoogde aksies ten einde grensveiligheid te verbeter.
Aspekte verbandhoudend met die totstandkoming van skutte, die afwesigheid van ‘n grenspad, asook die gebrek aan effektiewe selfoonnetwerke was ook bespreek met definitiewe intervensies wat van stapel gestuur gaan word.
Wilken meen dat die gesprek noodsaaklik was en dat daar ‘n positiwiteit tussen kern rolspelers en departemente is om die veiligheidsaspekte wat gemeenskappe teen die
grens nadelig beïnvloed, effektief aan te spreek.
