Boere bekommerd oor ‘onnodige’ veldbrande
Alhoewel sterk winde ‘n bydraende faktor was, meen dr. Jack Armour, kommersiële bestuurder by Vrystaat Landbou (VL) en verantwoordelik vir rampversagting en -reaksie, dat die onlangse veldbrande wat duisende hektaar grond verwoes het, moontlik vermy kon gewees het. “As ‘n mens na die AFIS-kaart van brandvoorvalle oor die afgelope paar dae kyk, wys dit duidelik dat die meeste van die brande langs nasionale paaie plaasgevind het,” sê dr Armour.
Volgens Armour kom die voorkoms van brande langs nasionale paaie voor as gevolg van verskeie faktore, soos onverantwoordelike bestuurders wat sigaretstompies by motorvensters uitgooi en vure wat onverskillig deur padwerkers en pendelaars langs die pad gemaak word om warm te bly en dan nie behoorlik geblus word nie. Hawelose mense wat onder brûe en in stormwaterpype onder paaie slaap en kook, is nog ‘n kommerwekkende neiging. Laastens, is swak beheer ten opsigte van brandlading vermindering (wat bestaan uit die sny van gras en bosse) ‘n mislukking aan die kant van nasionale padowerhede.
“Menslike optrede is ook die hoofoorsaak van baie van die brande langs die Lesotho-grens. Brande word doelbewus gestig as ‘n daad van intimidasie en vergelding wanneer oorgrensboere die weiveld van ander onwettig gebruik.” sê Armour. “Foutiewe Eskom-kraglyne en kwaadwillige brandstigting kan ook brande veroorsaak.”
“Onder die voorspelde rooi brandgevaar-indeks toestande van stormsterk, warm, rukwinde wat oor swaar brandlading waai, is Brandbeskermingsverenigings (BBV’s) almal op hoë gereedheid. Hul is egter basies hulpeloos teen wegholveldbrande in hierdie toestande.” merk Dr Armour op.
In die lig hiervan, doen VL ‘n ernstige beroep op padgebruikers om waaksaam te wees en die weggooi van sigarette en rommel te vermy, veral glas en ander items wat ‘n vergrootglas-effek kan hê. VL doen verder ‘n beroep op die betrokke owerhede om die brandlading wat verteenwoordig word deur gras en bosse langs die paaie te verminder. Boere word ook versoek om gebiede waar daar ‘n hoë brandlading is aan te meld, asook om hul kraglyne vir foute en voëlneste na te gaan en dit aan ESKOM en aan VL te rapporteer om op te volg. “Voorkoming altyd beter as beheer.”
Boere bekommerd oor ‘onnodige’ veldbrande https://t.co/i4Li23YvjB#ArriveAlive #InsuranceChat @vslandbou @BurnshieldZA pic.twitter.com/cNFcYFfk6T
– Arrive Alive (@_ArriveAlive) August 16, 2024
